Kalikasan: Kabuhayan!

        Napakahalaga ng kalikasan, subalit maraming tao ang hindi nagpapahalaga nito. Sa halip na alagaan at protektahan, ay sinisira ito.

 

        Ang kalikasan ang nagbibigay sa atin ng mga pagkain at hilaw na materyal sa pagbuo ng mga produkto. Ito ang proteksiyon natin sa mga mapaminsalang kalamidad gaya ng bagyo, baha, pagguho ng lupa, at iba pa. Dito rin nakatira ang mga hayop na nagbibigay sa atin ng mga pagkain, at tumutulong sa pagbalanse ng ekosistema.

 

        Noon, ang ating mga ninuno ay nakakapamuhay nang sagana dahil lamang sa ating mga kalikasan. Hanggang ngayon patuloy tayong umaasa sa ating mga kagubatan at iba pang anyong tubig at anyong lupa.

 

        Subalit, tingnan ninyo ang epekto ng hindi pagpapahalaga sa ating kalikasan. Matinding baha kapag may bagyo o kapag umuulan. Gumuguho ang mga lupa dahil sa walang habas na pagpatag ng kabundukan at pagputol ng mga puno. At kapag tag-init naman ay sobrang init talaga! Sa mga panahong ito natin naiisip ang kahalagahan ng pagtatanim ng mga puno.

 

        Kaya kung hindi natin pahahalagahan ang kalikasan ay para na rin nating kinikitil ang sarili nating buhay.