Hindi ako nakatulog sa pag-iisip ng mga dapat gawin. Pinuyat ako ng mga bagay, na kahit pilit kong isantabi ay hindi ako tinatantanan.
Nang pumasok ako sa school, para akong nakalutang sa hangin. Wala pa ring magandang solusyon ang pumapasok sa kukote ko. Pakiramdam ko, bigla akong nabobo.
Bobo na nga ba ako sa pag-ibig? E, samantalang para lang itong 1+1=2.
Nakaupo na ako sa tabi ni Riz at nasa harap na ng klase ang professor namin, nang biglang nag-pop out sa utak ko ang katotohanan.
Kaya pala ako nasasaktan dahil mali ang formula-- 1+1=3. Dalawa sila, kaya nagiging tatlo kami.
"Mr. Canales, please explain this statement," sabi ng professor. Dalawang beses na pala niya akong tinawag.
Nakarinig pa ako ng tawanan bago ako tumayo para mag-explain. Matalino naman ako sa academics, pero bobo sa pag-ibig.
"Isa lang, Red, isa lang," sabi ng konsensiya ko.
"Paano? Bakit? Pero, pareho na nga silang nawawala. Si Riz, malamig na. Si Dindee naman, naglaho na. One plu one equals zero (1+1=0) yata ng tamang formula, e," monologue ko sa isip ko habang abalang sumasagot si Riz sa aming short quiz. Blangko ang papel ko. Okupado naman ang isip ko.
"Ano ba ang nangyayari sa 'yo, Red?" iritableng tanong ni Riz. "Kanina ka pang gan'yan."
"Ikaw." Siyempre, hindi ko nasabi iyon. Umiling lang ako. Hindi ko naman talaga siya problema. Alam ko namang mahal niya ako. Naglalamig-lamigan lang siya para makuha ang full attention ko. Ramdam niya kasing may pagmamahal pa rin ako kay Dindee.
"Ayusin mo naman ang buhay mo. Hindi na kita maintindihan," halos pabulong niyang litanya. "Sabihin mo lang kung hindi ka na masaya sa akin. Maaga pa para mag-shift ka ng course kung napilitan ka lang talagang mag-Education."
Napatingin ako kay Riz. Nagkakamali yata siya ng paratang at hinuha. "Hindi. Gusto ko ang course na ito. Napuyat lang ako kagabi."
"Puyat? Bakit?"
"Pass your papers!" deklara ng professor. Saved by the bell. Hindi ko na kailangang magpaliwanag. Kaya lang, wala akong naipasa.
Babawi na lang ako.
Maghapon akong wala sa ulirat. Gayunpaman, makatulong iyon para makabuo ako ng malaking desisyon. Sasaglit ako sa Aklan. May ipon na ako, kahit pamasaheng back and forth lang.
Pagkatapos niyon, aayusin ko na ang sa amin ni Riz. 'One plus one equals two' lang dapat.
No comments:
Post a Comment