Ang Alphabet Garden ng Pamilyang Flores

Nasa gitna ng malawak na bakuran ang Pamilya Flores.

"Daddy, Mommy, parang may kulang po," sabi ni Margarita.

"Ano iyon, Margarita?" tanong ni Daddy Fernan.

"Oo nga, para ngang may kulang," sang-ayon ni Mommy Melissa.

"Ah, alam ko na! Kulang ng palaruan," sagot ng ama.

"Hindi po." Nalungkot si Margarita.

"Mas maganda ang bahay kapag may mga halaman, hindi ba, Margarita?" tanong ng ina.

"Opo, Mommy!" Napangiti na si Margarita.

"Ay, oo nga pala! Sige, magtatanim tayo ng nga halaman. Salamat sa ideya, Margarita!"

"Walang anuman po, Daddy."

"Ano-anong halaman ba ang gusto mo?"

"Kahit ano po, basta ang gusto ay magkaroon tayo ng alphabet garden."

"Alphabet garden?!" magkasabay na bulalas nina Mommy Melissa at Daddy Fernan. Nagpatingin sila sa nakangiting anak.

Napakamot si Daddy Fernan, saka nangako kay Margarita na magkakaroon sila alphabet garden.

Kinabukasan, nagsimula na ang pagpapagawa ng Pamilya Flores ng mga sementong patungan ng mga paso. Nakasunod iyon sa mga titik ng alpabeto.

Hindi maitago ni Margarita ang kanyang pananabik.

Isang araw, pinanunuod nila ang mga trabahador sa kanilang bakuran.

"Daddy, Mommy, kailan po matatapos ang alphabet garden natin?" tanong ni Margarita.

"Malapit na, anak," sagot ni Daddy Fernan.

"Mamimili na nga kami sa makalawa ng mga halamang nakapaso," wika naman ni Mommy Melissa.

"Talaga po? Naku, hindi ko na po mahihintay na makita ang hardin natin," bulalas ni Margarita.

Nang dumating na ang pinakikihintay na araw ni Margarita, walang mapagsidlan ang kanyang kaligayahan nang makita niya ang isang trak. Ibinaba mula roon ang mga namumulaklak na halaman.

"Daddy, Mommy, tutulungan ko na po kayo," alok ni Margarita nang matapos maibaba ng mga drayber at pahinante ng trak ang mga halamang nakapaso.

"Sige, anak," sabi ni Mommy Melissa.

"Ingat lang, ha? May mga pangalan ang bawat halaman. Tingnan mong maigi at ipatong sa tamang patungan," bilin ni Daddy Fernan.

"Opo!"

Masayang nagtulong-tulong ang mag-anak at nang matapos, isa-isang binasa ni Margarirlta ang mga pangalan ng mga bulaklak.

"Amaryllis, Begonia, Carnation, Daisy, Eucalyptus, Fuschia, Gardenia, Hibiscus, Ivy, Jasmine, Kalanchoe, Lavender, Magnolia, Narcissus, Orchid, Poinsettia, Queen Anne's Lace, Rose, Sunflower, Tulip, Violet, Water Lily." Nalungkot si Margarita nang mapansin niyang walang halaman sa patungang X, pero itinuloy niya ang pagbasa. "Yellow bell at Zinnia."

Napansin agad iyon ni Daddy Fernan. "Pasensiya ka na, anak... Wala akong nakitang halaman na nagsisimula sa titik X."

"Paano po iyan? Hindi po buo ang alphabet garden natin kapag walang X," sabi ni Margarita.

Inakbayan siya ng kanyang ina. "Huwag ka nang malungkot. Gagawa kami ng paraan para mabuo ang ating alphabet garden."

Tumango lamang si Margarita.

Araw-araw, hinihintay niyang makompleto ang kanilang alphabet garden, ngunit parang nawawalan na siya ng pag-asa.

Isang gabi, nagbasa siya ng encyclopedia. Naghanap siya roon ng mga halamang nagsisimula sa letrang X. Nabuhayan siya ng loob nang may nahanap siya.

Kinabukasan, pumunta si Margarita sa bilihin ng mga halaman.

Nagulat ang mga magulang niya nang umuwi siyang may dalang nakapasong halaman.

"Mommy, Daddy, makokompleto na po ang alphabet garden natin!" masayang pagbabalita ni Margarita.

"Sigurado ka ba, anak?" tanong ni Mommy Melissa. "Chrysantemum ito, na nagsisimula sa titik C."

Ngumiti muna si Margarita. "Nabasa ko po sa encyclopedia. Tinatawag din po itong Xeranthemum."

"Wow, ang galing mo naman, anak!" sabi ng ama. "Halika na, ilagay na natin sa patungan.

Pagkatapos nilang ilagay ang Xerathemum sa patungan, isa-isang binasa uli ni Margarita ang mga pangalan ng mga halaman.

"Amaryllis, Begonia, Carnation, Daisy, Eucalyptus, Fuschia, Gardenia, Hibiscus, Ivy, Jasmine, Kalanchoe, Lavender, Magnolia, Narcissus, Orchid, Poinsettia, Queen Anne's Lace, Rose, Sunflower, Tulip, Violet, Water Lily, Xeranthemum, Yellow bell at Zinnia. Yehey!"

Napapalakpak sa tuwa ang mag-anak na Flores.