Pagsulat ng Diary

“Dear Diary.” Ito ang madalas na bungad sa pagsulat ng diary o talaarawan. Bakit nga ba ganito? Parang love letter ba ito?

 

Oo, ganoon na nga. Ang pagsusulat ng diary ay parang pagsusulat lang para sa iyong kaibigan. Itinuturing kasing matalik na kaibigan si Diary. Siya ang lubos na pinagkakatiwalaan ng sumusulat sa kaniyang mga iniisip, pinaplano, nararamdaman, at nararanasan. Sa madaling salita, lahat ng sikreto ay maaaring isulat sa diary.

 

Ang talaarawan (diary) ay uri ng sulatin na kinapapalooban ng mga tala ng mga pangyayari, kaisipan, damdamin, o saloobin ng sumusulat sa araw-araw.

 

Ito ay kalipunan ng mga baha-bahaging sulatin na nakasulat at nakaayos nang sunod-sunod na petsa ayon sa porma ng kalendaryo.

 

Ito ay maaaring pribado o pansarili at maaari ding maging akdang pampanitikan. Ang halimbawa nito ay “Diary of a Wimpy Kid.”

 

 

Ang talaarawan ay natatanging bagay na nagbibigay ng daan upang talakayin ang iyong mga emosyon. Naitatala rito ang mga pangarap o ideya mo sa mga bagay-bagay o usapin.

 

Ito ay sumasalamin din sa pang-araw-araw na buhay ng manunulat sa pamayanan o kapaligirang kaniyang ginagalawan.

 

Paano sumulat nito?

 

Wala naman talagang tiyak na paraan upang magsulat ng isang talaarawan. Malaya ang indibidwal na sumulat nito sa anomang anyo. Subalit, may ilang mga pangunahing teknik na maaaring isagawa upang maisulat at maipahayag ng manunulat ang lahat na nasa kaniyang puso at isipan.

 

 

Ano nga ba ang maaaring isulat sa diary?

 

Sa diary, maaaring maglista ng mga dapat gawin o mga nagawa na. Maaaring magsulat dito ng mga saloobin, nadarama, at iniisip. Makatutulong ding maibsan ang bigat na nararamdaman kung isusumbong kay Diary ang mga problema, agam-agam, at kalituhan. Maaari ding ilagay rito ang mga pantasya sa buhay. At siyempre, masarap isalaysay sa diary ang mga kabiguan. 

 

 

Paano ba sisimulan ang pagsulat ng diary?

 

Dahil may kalayaan ang pagsulat ng diary, wala naman talagang limitasyon ang pagsusulat nito. Subalit maaaring simulan ito sa paglalahad ng mga pangyayari o gawain mo sa buong araw. Ilahad o isalaysay ang mga kaganapan o karanasang nagpaigtad ng iyong emosyon, damdamin, at saloobin, gaya kung anong nangyari sa paaralan kung saan nakasulat ka ng tula o maikling kuwento.

 

Maaari ding magsimula sa paglilista ng mga plano—planong gawin o planong bilhin, na maaaring maisagawa sa loob ng maikli o mahabang panahon. Siyempre, isa-isahin din ang mga paraan o hakbang sa pagkamit ng mga iyon.

 

Maaari ding gamitin ang kasalukuyan mong emosyon sa pagsisimula. Halimbawa, malungkot ka sa araw na ito. Isulat mo ang mga dahilan ng iyong kalungkutan. Hayaan mong dumaloy lahat ng iyong nararamdaman sa iyong mga titik. Maaari ka ring gumamit ng mga linya sa kantang nakaka-relate ka.

 

Ang paggamit ng isang inspirational quote- na galing sa kilalang tao, sa linya sa pelikula, o sa mga karakter sa kuwento, ay mainam ding gawing simula. I-relate mo ito sa buhay mo at ipaliwanag kung bakit mahalaga ito sa iyo. Ipaliwanag mo ang napiling quote sa iyong sariling salita.

 

Ang mga hobbies at interests mo-- gaya ng gardening, reading, writing, sports, o cooking, ay maganda ring pagsimulan ng topic. Sabihin mo ang mga plano tungkol sa hilig mo. Ipakilala mo rin ang mga taong nakapag-inspire sa iyo ng katulad ng gusto mo. Maglagay ka rin ng mga ideyang gagawin mo sa mga susunod na araw tungkol sa napili mong hobby.

 

 

Maaari kang mag-iba-iba ng entries mo araw-araw. Maaaring tungkol sa pag-aaral o edukasyon, tungkol sa pag-ibig o hinahangaang tao, tungkol sa problema sa pamilya, pera, o pisikal na kaanyuan, maaaring tungkol sa pinagkakaabalahan, trabaho, o extra income.

 

May format ba ang diary?

 

Opo, meron! Simulan mo ito sa pagsulat ng petsa sa kanang bahagi ng notebook o anomang susulatan mo. Sa ibaba at kaliwang bahagi naman ay isulat ang ‘Dear Diary.’ Pagkatapos, simulan nang isulat ang lahat ng nasa isip at puso mo. Kapag naisulat mo nang lahat, ilagay sa ibaba ng content—sa kanang bahagi—kapantay ng petsa—ang pangalan mo.

 

Ganito:

 

 

Oktubre 21, 2023

 

Dear Diary!

 

Excited akong magsulat ngayon ng diary. Kaya, pinag-aralan ko ito. Nag-research ako online. Nagbasa ako ng mga hakbang, tips, at samples. Madali lang pala!

 

Natutuwa akong magsimula ng pagsusulat ng diary o talaarawan. Sa palagay ko, gagawin ko na ito araw-araw.

 

Juan,

 

Ano-ano ang mga dapat tandaan sa pagsulat ng diary?

 

Personal ang diary, kaya gumamit ng mga panghalip panao na nasa unang panauhan, gaya ng ko, ako, akin, at iba pa. 

 

Maging matapat sa paglalahad ng mga impormasyon at detalye ng iyong karanasan, plano, o saloobin. Huwag matakot o mahiyang maglahad ng katotohanan.

 

Kung natatakot naman maglahad ng katotohanan, lagyan na lamang ng lock ang diary o kaya’y maglagay ng mga alyas para sa mga taong ayaw banggitin ang pangalan.

 

May mga pagkakataong napagtatanto mo ang iyong mga pagkakamali. Huwag mahiya o matakot ilahad ang mga aral na natutuhan mula sa karanasan o pangyayaring iyon.

 

Palayain mo ang iyong damdamin at kaisipan. Malaya mo itong isulat sa diary nang hindi masyadong binibigyang-pansin ang teknikalidad ng mga pangungusap. Magsulat ka lang nang magsulat ayon sa iyong naiisip at nararamdaman. Walang manghuhusga sa iyo. Ang diary ay nakadisenyo naman bilang pansariling kaaliwan, maliban na lamang kung ito ay para sa publiko.

 

Isulat mong lahat ang detalye ng pangyayari, na nais mong ilahad sa diary. Habang sariwa ito, isulat na kaagad. At hindi naman ibig sabihin ng detalyado ay napakahaba ng iyong isusulat. Gawin itong malaman, pero maiksi. Ang mahalaga, nakapagpapahayag ka ng damdamin, saloobin, o ideya.

 

At ano naman ang tips sa pagsulat ng diary?

 

Magtakda ng oras kung kailan ito gagawin o kailan magsusulat upang hindi ka mapagod. Ang pinakamainam na oras sa pagsusulat nito ay bago matulog. Maaari ding magsulat kahit anong oras, lalo na kung may ideyang nais isulat. Maaari din namang magsulat ng tatlong beses sa isang linggo. Huwag mo itong ituring na dagdag-trabaho. Gawin mo itong pantanggal ng stress.

 

Kung mahusay kang mag-drawing o mag-sketch, maaari mong lagyan ang diary mo ng iyong mga guhit. Makadaragdag ito ng aesthetic at motivation.

 

Sulat na! Sigurado akong marami kang nais isulat.