Hindi ka masaya, 'di dahil ika'y mag-isa,
kundi dahil hindi mo alam ang maganda.
Para sa'yo, ang lahat ay 'di kaiga-igaya.
Sa tingin mo, perpekto ka ngang talaga.
Hindi ka masaya dahil makasarili ka.
Nais mo'y sa'yo lang, atensiyon ng iba.
Ayaw mong nauunahan o nababalewala.
Gusto mong ikaw lang lagi ang bumida.
Hindi ka masaya 'pagkat may inggit ka
Na nananahan sa puso mo at sa diwa.
Ayaw mong mga paa mo'y nasa lupa.
Hangad mo lang, lumipad, tumingala.
Hindi ka masaya dahil 'di mo nakikita
Ang mabubuting bagay, na gawa ng iba.
Sa halip, pintas ang kanilang napapala
Mula sa'yo, na animo'y kay taas-taas na.
Hindi ka masaya dahil mareklamo ka,
Puro negatibo ang iyong nasa bunganga,
Lagi kang aburido, atat, at maramot pa
At, hindi ka marunong ngumiti't tumawa.
No comments:
Post a Comment