Hayan na si Big Juan!

             Habang may earthquake drill sa paaralan, pinagtatawanan ng mga kaklase si Juan at sumisigaw ang mga ito ng “Hayan na si Big Juan! Mag-duck-cover-and-hold na!”

            “Wala na kayong pinipiling oras para magtuksuhan! Hindi na ninyo sineryoso ang earthquake drill! Paano kung magkatotoo ito? Maililigtas niyo ba ang sarili ninyo?” pagalit ni Binibining Caridad nang bumalik sila sa silid-aralan.

            Tahimik ang buong klase. Si Juan naman ay hihikbi-hikbi.

“Dahil hindi ninyo inirespeto ang earthquake drill kanina, magkakaroon tayo ng isang gawain,” deklara ng guro.

Parang natuka ng ahas si Paeng, na siyang pasimuno, dahil hindi nito alam ang gagawin.

            “Tumayo kayo, Yolanda, Odette, at Glenda, dahil madalas ninyong pagtawanan si Juan. Magbigay kayo ng tatlong dapat gawin bago ang lindol,” sabi ni Binibining Caridad.

Parang lindol ang panginginig ng tatlong bully.

Pero ang bilis na sumagot ni Yolanda. Parang tsunami. “Iwasan ang pagsabit o pagkabit ng mabibigat at babasagin sa dingding, gayundin ang pagpatong sa mga kasangkapan ng mabibigat na bagay.”

Malakas na binigkas ni Odette ang kaniyang sagot—parang pagputok ng bulkan. “Panatilihing nakahanda ang Go bag.”

Maikli at pabigla-bigla naman ang sagot ni Glenda—parang landslide. “Maging alerto.”

“Tumayo kayo, Pablo, Rolly, at Ulysses dahil madalas ninyong biruin si Juan. Magbigay kayo ng tigdadalawang paraan para mabawasan ang epekto habang lumilindol,” sabi ni Binibining Caridad.

Parang bagyo na nasa Signal Number 3 ang lakas ng kabog ng dibdib ng tatlo dahil sa tanong ng kanilang guro.

“One. Isagawa ang ‘Duck, Cover, and Hold’ kung nasa loob ng gusali. Two. Lumayo sa mga bagay na babasagin, mabibigat, at maaaring maitumba o bumagsak,” sagot ni Pablo.

“Three. Maaaring tumayo, umupo, o mag-iskwat sa matibay na bahagi o poste ng bahay o gusali habang tinatakpan ng kamay ang ulo at batok. Four. Pumunta sa open space, kung nasa labas,” sagot ni Rolly.

“Five. Kapag nasa sasakyan o kapag nagmamaneho, itabi at ihinto ang sasakyan. Six. At kapag malapit o nasa dagat, lumikas at pumunta sa ligtas na lugar,” sagot naman ni Ulysses.

“Tumayo kayo, Ompong, Pedring, Pepeng, at Paeng dahil madalas ninyong asarin si Juan. Magbigay kayo ng mga dapat gawin pagkatapos ng lindol,” sabi ni Binibining Caridad.

Parang malalakas na bagyo ang ipinakitang kayabangan nina Ompong, Pedring, at Pepeng. “Ang dali naman!” sabi ng mga ito. Samantala, natatawa pa rin si Paeng.

“Hintayin ang abiso ng kinauukulan bago bumalik sa bahay o gusali,” sagot ni Ompong. Kumaldag pa ito.

“Suriin ang linya ng tubig at kuryente, LPG, at ang paligid,” sagot ni Pedring. Nag-pogi pose pa ito.

“Tingnan kung may nabasag, nagiba, natumba, bumitak, bumagsak, natapon, at nasira na maaaring pagmulan ng isa pang sakuna gaya ng sunog,” sagot ni Pepeng. Sumuntok-suntok pa ito sa hangin na animo’y may kalaban.

“O, ikaw na ang sasagot, Paeng,” untag ni Binibining Caridad.

Pumulanghit muna ng tawa si Paeng, kaya natawa rin sina Ompong, Pedring, at Pepeng.

“Umayos ka, Paeng!” pagalit ng guro. “Ano’ng sagot mo?”

“Itsek din ang mga kasamahan, lalo na ang mga bata, matatanda, may kapansanan, at buntis,” natatawa pa ring sagot ni Paeng. “Huwag kakalimutan si Juan, baka nadaganan kasi hindi makatakbo.”

Muling narinig ang malakas na tawanan sa silid-aralan na parang pagputok ng bulkan.

“Tumahimik kayo!” Parang nagbuga ng lava si Binibining Caridad.

            Umiiyak at patakbong lumabas si Juan sa silid-aralan, kasabay ang pag-uga ng gusali. Nayugyog ang mga upuan, kaya napasigaw ang lahat ng “Hayan na ang Big One.”

            “Totoo na ito. Isagawa natin ang ating pinag-aralan, Dali!” utos ng guro.

Isinagawa ng lahat ang Duck, Cover, and Hold habang lumilindol. May mga umiiyak. May mga tahimik lang. At may mga nagdarasal.

            Nang matapos ang pagyanig, hinanap nila si Juan.

            “Juan, mabuti, ligtas ka rin,” sabi ni Paeng. Inabot niya ang kamay kay Juan. “Halika ka na.”

Humingi ng kapatawaran ang mga kaklase ni Juan. At dahil sa nangyari, ang lahat ay maraming natutuhan.