BALAGTASAN: Death Penalty: Okey o Hindi?

Lakandiwa:

Magandang araw sa ating madla at ating mga bisita!

Narito ako ngayon sa inyong harapan at magpapakilala,

Ako ang inyong lakandiwa na nagmula pa sa bayan ng Calamba!

Makikibahagi sa isang balagtasang tungkol sa napapanahong usapi't balita.

Dalawang dalubhasang may kanya-kanyang saloobi't panig,

Mga salitang mula sa kanilang bibig ang ating maririnig.

Halika! Pakinggan natin sila at maliwanagan,

Tungkol sa usaping death penalty na kontrobersyal at pinag-uusapan.

Okey:

Magandang araw sa inyo ating madla at aming lakandiwa!

Hindi na ako magpapaligoy-ligoy pa at nais kong sabihin na,

Sang-ayon ako sa death penalty na ipatupad para sa ating bansa.

Para mabawasan ang krimen na nangyayari sa kapaligiran lalo na sa ating kapwa!

Hindi lihim sa atin na hindi patas ang ating batas,

Kapag mapera ka kahit anong kasalanan ay makakatakas.

Hindi tulad sa death penalty na wala nang piyansa.

Wala nang magagawa ang pera, na sinasanto ng iba.

Hindi:

Ikaw na mismo ang nagsabing hindi patas ang batas

Oo, mayayaman lang ang kinikilingan niyan dito sa Pilipinas

Kaya bakit death penalty ang iyong hinahangad?

Hindi ba ang sabi ng Diyos-- matuto tayong magpatawad?

Ako nga pala ang inyong ginoong Maka-Diyos at makatao

Lubos akong tumututol sa binibining ito at sa kaniyang gusto

Pakiusap, death penalty sa ating bansa ay huwag isa batas

Maraming paraan upang kriminalidad ay mabawasan at malutas.

Okey:

Maka-Diyos din ako, Ginoo, ngunit masasabi mo bang masama ang kumitil ng buhay, kung pamilya mo na ang sangkot sa krimen ng walang kamalay-malay?

Mapapatawad mo ba ang taong winakasan na kaagad ang magandang kinabukasan ng iba?

Huwag na tayong magpaimpokrito dito,

Maka-Diyos ka nga pero tao ka pa ring nakakaramdam ng matinding kapighatian tulad ko.

Sa panahon ngayon, hindi na uubra ang salitang patawad.

Paano ang mga kababaihang r-in-ape ng mga hayok sa laman,

O hindi kaya ng mga among ginawang punching bag ang kanilang mga kasambahay,

Mapapatawad mo ba ang may sala kung kinabukasan at buhay ng iba ang kanilang niyurakan?

Death Penalty ang solusyon para takot ay tumatak sa puso ninoman.

Hindi:

May mas karumal-dumal pa kaysa sa mga nabanggit mong krimen

Silang mga bigtime criminal ang dapat sampulan at paslangin

Sila ay walang iba kundi ang mga magnanakaw sa kaban ng bayan

O, hindi ba, parang ginahasa at pinapatay nila ang mamamayan?

Kaya kung igigiit mo sa akin ang death penalty, Binibini,

Na dapat parusahan ang sinomang sa batas ay nagkamali

At sinasabi mong tama ang kamatayan bilang parusa

Piringan mo munang muli ang mga mata ng hustisya.

Okey:

Death penalty ay nararapat na ipatupad,

Upang mabawasan ang kriminalidad sa ating lipunan.

'Yang sinasabi mong bigtime criminal ang dapat sampulan at paslangin ay sasang-ayunan ko 'yan,

Upang matuto sila na sa batas lahat ay pantay-pantay at hindi pera ang makakapagligtas sa kanilang buhay.

Death penalty ang dapat ipatupad na batas ng pamahalaan,

Dapat walang pera na iiral para ang mga may sala ay parusahan ng kamatayan.

Kriminilidad ay mababawasan kapag may death penalty,

Matatakot rin ang taumbayan na gumawa ng mali.

Hindi:

Hindi okey ang death penalty sa bansa natin.

Hindi iyan ang solusyon sa pagsugpo ng krimen.

Kung nagkasala ang isang tao ay huwag kitilin

Dahil sa kulungan, impiyerno na ang kaniyang sasapitin.

Sapat nang kaparusahan ang habambuhay na pagdurusa

Hayaan ang mainit na selda ang magparusa

Sabi nga nila'y `di masosolusyunan ang problema

Kung isa pang kasalanan ang paraan ng pagtatama.

Okey:

Mawalang-galang sa inyo, Ginoo, ngunit ang pagkakakulong ay hindi sapat,

Lalo na sa bansa nating bulok ang seguridad.

ImpIyerno nga ang dapat sapitin ng mga kriminal sa loob ng rehas,

Ngunit para sa may pera, ginawa na lamang itong rehas na vacation house.

Ang death penalty ay nararapat isabatas,

Nang sa gano'n, kriminalidad ay mahulas!

Sa death penalty, lahat pantay-pantay at walang VIP treatment,

Sa death penalty, walang ubra ang kayamanan o asset.

Hindi:

Kung papatawan ng kamatayan ang may-sala,

Paano niya mapagbabayaran ang kaniyang ginawa?

Maaari pa siyang magbago at magsilbi sa Panginoon

At kapulutan ng aral ng iba at maging inspirasyon. 

Kaya, labis akong tumututol sa iyong gusto

Ang death penalty ay hindi maka-Diyos at makatao

`Pagkat ang Diyos nga ay nagpapatawad

Kahit ang makasalanan, minamahal niya nang tapat.

Lakandiwa:.

Salamat sa inyong dalawa, na kay gagaling!

Walang mahinang argumento't walang itulak-kabigin

Parehong may punto, na dapat dinggin

Parehong mabigat at malaman kung titimbangin.

Kaya, ang madla na ang bahalang humatol

Hindi na bale kung ang may sang-ayon, at may tutol

Ang mga mambabatas na ang magtatakda

Kung ang death penalty ba'y hindi o dapat ipatupad na.