Pagkakaroon ng Pagmamahal sa Kapwa

 

Pagkakaroon ng Pagmamahal sa Kapwa

             Mahalaga ang pagkakaroon ng pagmamahal sa kapwa dahil ito ay isa sa mga kautusan ng Diyos sa atin. Nais Niyang mahalin natin ang ating kapwa, kagaya ng pagmamahal natin sa ating sarili.

            Magkakaiba-iba tayo ng paraan ng pagpaparamdam ng pagmamahal sa ating kapwa, subalit iisa lamang ang ating nais iparamdam sa kanila. Iyon ay kung gaano sila kahalaga sa buhay natin—kilala man natin sila nang lubusan o hindi.

Ilan sa pagpapakita ng pagmamahal sa kapwa ay paggalang sa kanilang mga karapatan, pagtutuwid sa kanilang kamalian, pagtulong nang walang kapalit, pagpapatawad sa kanilang pagkukulang at pagkakasala, pagrespeto sa kanilang mga opinyon, kagustuhan, paniniwala, at prinsipyo, pagproprotekta sa kanila laban sa kasamaan at kapahamakan, at marami pang iba.  

Minsan, hindi talaga maiiwasang magtampo, mainis, at magalit tayo sa ating kapwa dahil labis na ang kaniyang ginawa sa atin. Pero, lagi nating tatandaang hindi natutulog ang Diyos. Ang pagganti ng kasamaan ay hindi Niya tinatanggap.

Kailangan pa rin nating iparamdaman sa kanila ang kabutihan at pagmamahal na galing sa Diyos. Lagi nating isapuso na kapag ang Diyos ang pinaghugutan natin ng pagmamahal, hindi tayo mauubusan para sa ating kapwa.