Redondo: Gig

Pakiramdam ko, inaasar ako ni Boss Rey. Hinahanap pa rin kasi niya si Mommy. Alam kong alam na niya na nagkuwento na si Mommy tungkol sa kamanyakisan niya. Pero, hindi pa rin siya nahihiya. Panay nga ang ngisi niya sa akin. Sabi pa niya kagabi sa akin, pagkababa ko ng entablado ay "Ang lakas ng karisma mo sa mga parokyano. Good looking boy!" Tapos, ginulo pa niya ang buhok ko at minasa-masahe ang likod ko. "Keep it up, Red, para magkakasundo tayo."

Hindi ako kumibo. Purely trabaho lang talaga ang intensyon ko sa bar niya. Kaya, pagkatanggap ko ng isanglibo, tumalikod na ako ng walang lingon likod. Sumunod naman agad si Dindee, na nakaabang lang sa may guard. 

Kanina, natulog lang ako ng natulog. Pakiramdam ko kasi ay pagod na pagod at puyat na puyat ako. Mabuti na lang at malamig ang simoy ng hangin. Kaya, alas-diyes na ako bumangon, 

"Sipag naman ng love ko!" papuring-bati ko kay Dindee. Naabutan ko kasi siyang nag-aayos at naglilinis sa sala. 

"Ay, Red! Gising ka na pala! Naisipan ko lang maglinis kasi, tatlong araw na lang pala ay Pasko na. Baka, marami kayong bisita."

''Hindi naman. Konti lang.."

"Ah ganun ba?! Okay lang.. At least, malinis tayo pagpasok ng Bagong Taon. Almusal ka na."

Sinamahan ako ni Dindee sa dining table. Pagkatapos ay sinabayan ko siya sa paglilinis. Nilinis niya ang sala, ako naman ay nilinis ko ang kusina. Napansin ko na nakapamili na pala si Daddy ng pang-noche Buena namin. I'm sure magiging maligaya ang Pasko ko ngayong taon. First time ko kasing magdidiwang ng Christmas na may kasamang girl friend, wala man uli si Mommy sa piling ko.

Alas-tres na kami natapos sa paglilinis. Pagod man, pero masaya kami. Nakapagkulitan pa nga kami n Dindee. Tapos, naisipan ko pang maggitara. This time, Christmas songs naman ang tinugtog ko. Sabi nga ni Dindee, sana daw matagal ko nang pinag-aralan ang mga kantang Pamasko para nakapag-carolling kami.

"Oo nga, e. Pero, okay lang naman kasi may gig naman ako sa MusicStram." paliwanag ko sa gf ko na nanghihinayang.

"Kaya lang, nagbigay lang ng masamang experience sa Mommy mo."

"Oo nga, e. Pero, strong si Mommy. Hindi naman siya natrauma. Nag-text nga sa akin kagabi. Mag-iingat daw ako kay Boss Rey. Hindi daw kasi malayong pati ako ay manyakin niya."

"Tama si Tita. Mukhang wala ng pinipili ang boss mo. Grabe nga makahawak sa'yo, e."

"Hayaan mo na. Iiwasan ko na lang. Ang importante, matapos ko ang kontrata."