Ang Mommy Ko

Hindi maramot ang mommy ko

Hindi niya binibili ang aking gusto

Ang sabi niya, “Masarap kainin ito”

“Masustansiya, kaya lulusog ka nito.”

“Huwag ‘yan, baka ikaw ay lumobo.”

Hindi ako magdadabog, nagrereklamo

Alam kong mabuti ang kaniyang gusto

Iniisip niya lang ang kalusugan ko.

 

Hindi masungit ang mommy ko

Palihim niyang sinasaway ako

At may kurot pang pinong-pino

Kaya agad na titigil ako, saka uupo

Bago tatahimik, saad ko’y “Sorry po.”

Inis niya’y para lang namang ipuipo--

Mabilis mawawala at maglalaho

Love na love pa rin niya ako.

 

Sobrang maunawaain ang mommy ko

Mga pagkakamali ko, ako’y natututo

Pangaral niya, aking isinasapuso

Aniya, “Paglaki mo’y malalaman mo.”

“Kaya makinig nang mabuti sa aking payo.”

Ganyan ang gawin mo. Dapat ganito.

Huwag mong gawin iyan. Hindi ganito.

Hayan, linyahan n’ya’y akin nang kabisado.