Hayan na si Big Juan! (Dulang Pambata)

 

Hayan na si Big Juan!

(Dulang Pambata)

 

 

Mga Tauhan:

      *Juan – laging pinagtatawanan ng mga kaklase dahil sa katabaan

      *Bb. Caridad – gurong tagapayo

      *Paeng – pasimuno sa tawanan

*Yolanda, Odette, at Glenda – madalas pagtawanan si Juan

* Pablo, Rolly, at Ulysses -- madalas biruin si Juan

*Ompong, Pedring, at Pepeng – madalas asarin si Juan

*Tagapagsalaysay

 

Tagpuan:

*Sa isang paaralan

 

 

Eksena 1: Labas. Sa tabi ng paaralan. Hapon

 

Tagapagsalaysay: Kasalukuyang isinasagawa sa kanilang paaralan ang

                        earthquake drill.

 

Mga Kaklase: (Pinagtatawanan si Juan at sumisigaw ang mga ito)

                       “Hayan na si Big Juan! Mag-duck-cover-and-hold na!”

           

 

 

Eksena 2: Loob. Sa silid-aralan. Hapon

 

Bb. Caridad: (Magagalit) “Wala na kayong pinipiling oras para                  

                     magtuksuhan! Hindi na ninyo sineryoso ang earthquake

                     drill! Paano kung magkatotoo ito? Maililigtas niyo ba ang

                     sarili ninyo?”

       

Tagapagsalaysay:  Tahimik ang buong klase. Si Juan naman ay

                     hihikbi-hikbi.

 

Bb. Caridad: “Dahil hindi ninyo inirespeto ang earthquake drill kanina,

                      magkaroon tayo ng isang gawain.”

 

Tagapagsalaysay:  Parang natuka ng ahas si Paeng, na siyang

                      pasimuno, dahil hindi nito alam ang gagawin.

           

Bb. Caridad: “Tumayo kayo, Yolanda, Odette, at Glenda, dahil madalas

                     ninyong pagtawanan si Juan. Magbigay kayo ng tatlong

                     dapat gawin bago ang lindol.”

 

Tagapagsalaysay: Parang lindol ang panginginig ng tatlong bully.

 

Yolanda: (Mabilis na sumagot na parang tsunami.) “Iwasan ang pagsabit

                    o pagkabit ng mabibigat at babasagin sa dingding, gayundin

                    ang pagpatong sa mga kasangkapan ng mabibigat na  

                    bagay.”

 

Odette: (Malakas ang boses na parang pagputok ng bulkan)               

                   “Panatilihing nakahanda ang Go bag.”

 

Glenda: (Maikli at pabigla-biglang sumagot na parang landslide) “Maging  

                   alerto.”

 

Bb. Caridad: “Tumayo kayo, Pablo, Rolly, at Ulysses dahil madalas

                    ninyong biruin si Juan. Magbigay kayo ng tigdadalawang

                    paraan para mabawasan ang epekto habang lumilindol.”

 

Tagapagsalaysay: Parang bagyo na nasa Signal Number 3 ang lakas

                    ng kabog ng dibdib ng tatlo dahil sa tanong ng kanilang

                    guro.

 

Pablo: “One. Isagawa ang ‘Duck, Cover, and Hold’ kung nasa loob ng

                   gusali. Two. Lumayo sa mga bagay na babasagin, mabibigat,

                   at maaaring maitumba o bumagsak.”

 

Rolly: “Three. Maaaring tumayo, umupo, o mag-iskwat sa matibay na

                  bahagi o poste ng bahay o gusali habang tinatakpan ng

                  kamay ang ulo at batok. Four. Pumunta sa open space, kung

                  nasa labas.”

 

Ulysses: “Five. Kapag nasa sasakyan o kapag nagmamaneho, itabi at

                 ihinto ang sasakyan. Six. At kapag malapit o nasa dagat,

                 lumikas at pumunta sa ligtas na lugar,”

 

Bb. Caridad: “Tumayo kayo, Ompong, Pedring, Pepeng, at Paeng dahil madalas ninyong asarin si Juan. Magbigay kayo ng magbigay ng mga dapat gawin pagkatapos ng lindol.”

Ompong, Pedring, at Pepeng: (Nagpakita ng kayabangan, na parang

                malalakas na bagyo) “Ang dali naman!”

 

Paeng: (Natatawa lang)

 

Ompong: “Hintayin ang abiso ng kinauukulan bago bumalik sa bahay o

               gusali” (Kumaldag pa ito.)

 

Pedring: “Suriin ang linya ng tubig at kuryente, LPG, at ang paligid”

               (Nagpogi pose pa ito.)

 

Pepeng: “Tingnan kung may nabasag, nagiba, natumba, bumitak,

               bumagsak, natapon, at nasira na maaaring pagmulan ng isa

               pang sakuna gaya ng sunog.” (Sumuntok-suntok pa ito sa

               hangin na animo’y may kalaban.)

 

Bb. Caridad: “O, ikaw na ang sasagot, Paeng.”

 

Paeng: (Pumulanghit muna ng tawa)

 

Ompong, Pedring, at Pepeng: (Natawa rin sila.)

 

Bb. Caridad: (Galit) “Umayos ka, Paeng! “Ano’ng sagot mo?”

 

Paeng: “Itsek din ang mga kasamahan, lalo na ang mga bata,      

              matatanda, may kapansanan, at buntis.” (Natatawa pa rin)

              “Huwag kakalimutan si Juan, baka nadaganan kasi hindi

              makatakbo.”

 

Tagapagsalaysay: Muling narinig ang malakas na tawanan sa silid-

              aralan na parang pagputok ng bulkan.

 

Bb. Caridad: “Tumahimik kayo!” (Parang nagbuga ng lava)

 

Tagapagsalaysay: Umiiyak at patakbong lumabas si Juan sa silid-

              aralan, kasabay ang pag-uga ng gusali. Nayugyog ang mga

              upuan, kaya napasigaw ang lahat.

 

Mga kaklase: “Hayan na ang Big One.”

     

Bb. Caridad: “Totoo na ito. Isagawa natin ang ating pinag-aralan, Dali!”

 

 

Tagapagsalaysay: Isinagawa ng lahat ang Duck, Cover, and Hold

              habang lumilindol. May mga umiiyak. May mga tahimik lang. At

              may mga nagdarasal.

 

 

Eksena 3: Labas. Sa pasilyo. Hapon

 

Tagapagsalaysay: Nang matapos ang pagyanig, hinanap nila si Juan.

 

Paeng: “Juan, mabuti, ligtas ka rin,” (Inabot ang kamay kay Juan) “Halika

             ka na.”

 

Tagapagsalaysay: Humingi ng kapatawaran ang mga kaklase ni Juan.

            At dahil sa nangyari, ang lahat ay maraming natutuhan.