Handa Kami (Dulang pambata)

Handa Kami

(Dulang pambata)

 

Mga Tauhan:

           *Kurt - bunso

           *Ate Princess – pangalawa

           *Ate Britney - panganay

           *Papa

           *Mama

           *Lola Carmen

 

Tagpuan:

           *Sa bahay ng pamilya

 

Eksena 1: Labas. Sa bakuran ng pamilya. Umaga.

Kurt: "Papa, totoo po bang may parating na bagyo?"

Papa: "Oo, Kurt. Malakas daw.”

Kurt: Dapat maghanda po tayo.”

Papa: Oo, iyan ang dapat, kaya maghanda na kayong magkakapatid."

Kurt: “Opo, Papa.”

 

Eksena 2: Loob. Sa kuwarto ng magkakapatid. Umaga.

Kurt: "Ate Princess, Ate Britney, maghanda tayo para sa paparating na bagyo."

Ate Princess: "Pero paano?"

Ate Britney: "Ayaw ko! Naglalaro tayo ng mga manika. Normal at natural na pangyayari

lang naman ang bagyo. Dalawampu o mahigit na beses bumabagyo sa isang taon."

Kurt: "Pero iba ang parating na bagyo. Sabi sa balita, mas malakas ito kaysa sa mga

naunang bagyo. Kaya, mas mabuting maghanda tayo."

Ate Princess: "Ate, tama siya. Dapat maghanda tayo."

Kurt: "Nakita ko rin sa tv ang mga pinsalang ginawa ng bagyong Yolanda. Maaaring

mangyari sa atin kung hindi tayo maghanda."

Ate Britney: (Sandaling nag-isip, saka tumayo.) "Kayong dalawa, pareho kayong kakaiba! Hindi ako tutulong sa inyo. Maglaro na lang ako kaysa sumali sa inyo." (Iniwan ang mga kapatid)

 

Eksena 3: Loob. Sa sala ng bahay. Umaga.

(Bumaba sina Kurt at Ate Princess upang pag-usapan ang tungkol sa paghahanda.

Lumipas ang sampung minuto, napagsama-sama na nila ang bagay na kailangan para sa gagawin nilang emergency kit. Naihanda na nila ang flashlight, posporo, lighter, kandila, bottled water, mga de-lata, biscuits at crackers, first aid kit, lubid, Swiss knife, compass, at marami pang iba. Inilagay nila ang lahat ng iyon sa isang plastic box na may masikip na takip. Pagkatapos, bumalik na sila sa itaas upang makuha ang kanilang mahahalagang papel at dokumento, tulad ng mga sertipiko ng kapanganakan.)

Eksena 4: Loob. Sa kuwarto ng magkakapatid. Umaga.

(Nagulat sina Kurt at Ate Princess nang makita nila si Ate Britney.)

Ate Britney: (Inaayos ang mahahalagang dokumento. Ngumiti ito sa kanila.) "Tinutulungan

ko na kayo. Pinagalitan kasi ako ni Lola Carmen. Tama kayo... Pasensya na.”

Kurt: "Ayos lang, Ate Britney!"

(Tatlo na silang nagplano ng mga susunod na hakbang.)

 

 

Eksena 5: Labas. Sa bakuran ng pamilya. Umaga.

(Tinulungan nila ang ama sa paghahanda ng paligid ng kanilang bahay. Habang pinuputol ng ama ang ilang mga sanga ng puno, kinokolekta naman ng magkakapatid ang mga iyon.)

 

Eksena 6: Loob. Sa kusina ng bahay. Umaga.

(Tumulong din ang magkakapatid sa pag-aayos ng mga sirang bintana at iba pang bahagi ng kanilang bahay. Sinuri din ng ama ang koneksyon sa kuryente. Pagkatapos, nagsaing at nagluto sila ng adobo. Dinoble nila ang karaniwang dami ng mga iyon upang hindi sila magutom kapag magtagal ang bagyo.)

(Maya-maya, tumawag ang kanilang ina mula Hong Kong upang kumustahin sila.)

Papa: "Handa na talaga kami. Ang lahat ng ito ay dahil kay Kurt, na laging handa. Boy

scout talaga! Hinikayat niya kaming maghanda.

Mama: "Wow! Ang galing naman ni Kurt! Nakakatuwa! Masayang-masaya ako kahit hindi

ko kayo kasama ngayon. Panalangin ko palagi ang inyong kaligtasan. At huwag niyo

ring kalimutang magdasal."

Magkakapatid: (Saby-sabay) "Opo, Mama!"

Kurt: "Ingat din po, Mama!"

Mama: "Salamat! pagpalain kayo ng Diyos!" (Saka nagpaalam)

 

Eksena 7: Loob. Sa kuwarto. Gabi.

(Habang rumaragasa ang bagyo, nananalangin sila na sana'y walang sinoman ang mapahamak. Nakaragdag sa takot nila ang tila sumisipol na hangin. Hinahampas nito ang mga sanga ng puno ng caimito. Parang pinasasayaw rin nito ang kanilang bahay.

Nagpatuloy ang matinding ulan.)

 

Ate Princess: "Diyos ko! Tingnan ninyo, baha na sa labas."

Kurt: (Sumilip sa bintana. Nakita niya ang dahan-dahang pagtaas ng tubig.) "Naku, paano

kung umabot sa bahay natin?"

Ate Britney: "Huwag kang mag-alala. Ligtas tayo rito."

 

(Makalipas ang ilang minuto, napasigaw sila nang nawala ang kuryente.)

Ate Princess: "Papa! Papa!"

Kurt: "Ate, huwag kang magpa-panic. Nandito kami." (Nilapitan niya si Ate Princess.) "Nasa

baba si Papa."

Ate Britney: (Lumapit din kay Ate Princess) "Puntahan natin si Lola Carmen.

 

Eksena 8: Loob. Sa kuwarto ng lola. Gabi.

           (Nakaramdam ang magkakapatid ng kaligtasan nang magkasasama nila ang lola, pero lalong lumakas ang hangin. Talagang nakakatakot! Madalas silang sumigaw sa tuwing may maririnig silang ingay sa bubongan. Natatakot sila na baka mawala o baka liparin ang mga yero.)

 

Lola Carmen: ”Huwag kayong mag-alala. Ligtas tayo kasi nagdasal tayo sa Diyos na

protektahan tayo."

Kurt: "Opo, totoo po 'yan, Lola. At saka, naghanda po kami." (Niyakap si Lola Carmen.)