Ang Tatlong Kulay ng Tao sa Mundo (Mito)

 Ang Tatlong Kulay ng Tao sa Mundo

 

Si Sanghiyang ay diyos ng mga apoy. Nilikha niya ang mundo at mga nilalang dito mula sa mga luwad na hinuhulma at hinuhurno.

 

Pagkatapos niyang likhain ang kalawakan, katubigan, kalupaan, at mga nilalang na may buhay, nagpahinga siya.

 

Kinabukasan, naisipan niyang lumikha ng kawangis niya. Gumawa siya ng pigurang luwad, saka niya isinalang sa hurno.

 

“Naku, nasunog!” bulalas niya. Bigo man, pero hinipan niya iyon, kaya naging tao.

 

Sa sumunod na araw, gumawa uli siya ng pigura ng tao mula sa luwad, saka muling isinalang sa hurno. Dahil sa takot na masunog, hinango niya agad iyon.

 

“Hala, ang puti naman niya.” Hinipan niya iyon, kaya naging tao.

 

Sa ikatlong araw, naging maingat siya sa paghuhurno sa ikatlong pigura. Binantayan niya iyon maghapon.

 

“Wow! Tamang-tama ang kulay niya-- kayumanggi.” Hinipan niya iyon, kaya naging tao.

 

Tinawag niya ang tatlong tao. Nagbigay siya ng mga kautusan.

 

“Salamat po, Sanghiyang,” sagot ng tatlo.

 

“Sige na, humayo kayo’t magpakarami. Alagaan ninyo ang ating mundo.”