Ang Aking Pamilya

Sa umaga, sa akin, sila ang nanggigising

Matatamis na ngiti ang ibinibigay sa akin

May sinangag nang almusal na nakahain

Samahan pa ng pritong itlog at isdang daing

May sawsawan pang sukang maasim

Kay sarap ng aming pagsasaluhang pagkain!

Ganyan kami sa munting tahanan namin.

 

Sa aming bahay, dumadali ang mga gawain

Nagtutulungan at naghahati-hati sa gampanin

Si Kuya, bakuran nami’y kayang-kayang linisin

Si Ate, nakatoka sa mga labahin at hugasin

Ako nama’y laging handa—bunsong matulungin

Anoman ang kanilang ipagawa, aking gagawin.

Huwag lang magluto dahil hilig ko lang ay kumain.

 

Sa panahong ang pamilya namin ay may suliranin,

Si Nanay at si Tatay ay nananatiling matatag pa rin

Kanilang pagmamahal ang nagpapalakas sa amin

Gaano man kalakas ang bagyong dumating,

Tahanan nami’y gigiwang, subalit hindi daraing

Pagkat ang haligi at ilaw ng tahanan, aming kapiling

Umulan-umaraw, palagi silang nagniningning.

 

Sa gabi, bago kami matulog nang mahimbing,

Sama-sama kaming nagpapasalamat, nananalangin

Pamilya namin, nawa’y maging malusog, ‘di sakitin

Pamumuhay na simple ang tangi naming hiling

Palaging masaya, maging sa mga araw na darating

Anomang hirap at ginhawa ay aming tatanggapin

Sa pamilyang nagmamahalan, walang hindi kakayanin.