tula para kay mam glo

     

       MAHAL KA NAMIN, MAM GLO

Para po sa inyo, mahal naming kaguro,

Ang isang pagpupuring kawangis nito.

Ang nais naming ihandog at ipabaon sa inyo

At isang masagana’t masayang pagreretiro

Ang nais naming iyong kamtin at matamo.

Ang isang tulad ninyong, gurong totoo

Ay dapat iwangis sa diyamante at ginto.

Ang kinang nila’y di basta-basta naglalaho.

Gaya rin ng iyong puso at pagkatao,

Kailanma’y ang halaga’y di magbabago.

Pinupuri ka namin, pagkat ika’y guro

Na may pagpapahalaga sa kapwa-tao

Maging sa edukasyon at pagkatuto

Ng mga mag-aaral ng paaralang Gotamco

Simula pa noon, hanggang sa oras na ito.

Kapuripuri ang serbisyo ninyo, Mam Glo!

Ang inyong ambag sa institusyon ay di biro.

Nagkaroon ng pag-unlad at pagbabago

Dahil sa dedikasyon at pagtitiyaga ninyo

Sa pagtuturo man, maging sa ibang trabaho.

Isa po kayong ehemplo, yan ang totoo!

Pag kayo’y nawalay, mahahapis yaring puso.

Tiyak, buong paaralan ay manlulumo

Sapagkat isa na namang mabuting guro

Ang lilisan at magtatapos sa serbisyo.

Gayunpaman, Madam, kayo po’y humayo..

Kamtin ang ginhawa pagkatapos nito—

Nitong mahabang adhikaing…makatao.

Iyo namang tikman, buhay na bago

Kasama ang pinakamamahal na pamilya nyo.

Dalangin namin, lahat ng ikaliligaya ninyo.

Huminto man kayo sa inyong  pagtuturo,

Nawa’y tigib ng ligaya ang inyong puso

Sana’y inspirasyon, mahugot namin sa’yo

At matahak namin, landasin mong malayo.