Ang Tanging Hangad ng mga Guro

Makinig kayo, kami'y pakinggan ninyo

Sa aming mga problema at pagsamo

Damhin sana mga hinaing ng mga guro

Dagdag na sahod at bawas na trabaho

Ang buwis nga namin ay hindi makatao

Umaasang pamilya'y paano na? Paano?

Makinig naman sana kayong nasa puwesto

Sa mga sigaw at dalamhati ng aming puso

Gusto naming kami'y magturo ng magturo

Upang mga kabataan ay matuto at lumago

Maging dangal ng Pilipinas--- ng bayang ito

Kalidad na edukasyon, na nais nating matamo

Ng bawat bata o ng mag-aaral na Pilipino.

Huwag ng magbulag-bulagan, mga pinuno

Pagbibingi-bingihan ay tigilan na rin ninyo

Problema ng bayan solusyunan na ninyo

Tunay ninyong katuwang ay kaming mga guro

Handang maglingkod, pag-asa'y buong-buo

Tamang pasahod, sa tamang trabaho

Iyan ang tanging hangad ng mga guro

Sabi niyo nga, kami'y mga bayani ninyo.

Bakit ngayon kami ay inyong inaabuso?

Huwag naman ganun, kami'y mga tao.

May hangaring dakila sa kapwa-tao.