Redondo: Sigaw

Pumasok na si Riz kanina. Pumasok na rin si Dindee. Kaya lang, hindi pa rin niya ako kinikibo. Maghapon ko din siyang sinuyo sa text at tawag pero wala pa ring epekto.

Naisipan kong puntahan siya sa school nila. Nagpaalam ako kay Mam Dina. Mabuti pinayagan ako na lumabas ng school, ten minutes before uwian.

Hindi ako nahuli ng dating. Naabutan ko ang labasan nila.

“Dee..” tawag-bati ko sa kanya. Nagtagpo ang aming mga mata. Nakatawa siya ng magtama ang kanya sa akin. Kasama niya kasi ang mga kaklase niya.

Huminto sila. Bigla ding nag-iba ang hilatsa ng mukha ng girlfriend ko.

“Uy, sis. Mauna na kami! Bye, ingat kayo!” May kusa ang kaklase niyang chubby. Sumunod na rin ang iba pa.

“Hoy! Akala ko ba magmo-mall tayo?!” pasigaw na pahabol ni Dindee.

“Hindi na! Lugi kami. Kaw lang ang may jowa. Bye!” sagot naman ng isang payat na babae.

“Pwede kitang samahan sa mall.” Pacute kong sabi.

Nakatingin sa mga umalis na mga kaklase si Dindee. “Hindi na. Nagbago na ang isip ko.” Lumakad na siya. Mabilis.

“Dee..” Hinabol ko siya at naabutan. “Sorry na. Pag-usapan natin ‘to. I love you!” Nilakasan ko ang ‘I love you’. Sapat para marinig ng mga dumaraan.

Tuloy pa rin sa paglakad si Dindee.

“Dindee, mahal kita! Sorry na!” Mas nilakasan ko ang sigaw ko. “Dindee, I love you!”

Humintong bigla si Dindee kaya nagmadali akong makalapit sa kanya.

“Ang ingay mo! Ogag ka talaga, noh!” Kinurot niya pa ako sa may tagaliran. Tapos, ngumiti siya. “Ano na? Tara na! Samahan mo ako sa mall.” Hinila na niya ako. Hindi na ako nakapagsalita.

Hay, salamat! Okay na kami.