BlurRed: Respeto

Respeto

Hindi ako pumasok dahil sa malakas na ulan. Wala ring pasok si Mommy. Sayang, si Daddy lang ang may pasok. Buo sana kami. Pero, ayos lang. Nakapagkuwentuhan kami ni Mommy. Serious talk. Tungkol sa virginity. Naglakas-loob akong itanong sa kanya kung birhen pa ba siya noong ikinasal sila ni Daddy. Oo raw. 

"Mahalaga ang virginity, Red," dagdag pa niya.

Parang nalungkot ako. Naisip ko kaagad si Riz. "Bakit naman po?" tanong ko kahit alam ko naman ang sagot. Gusto ko lang ikubli ang kalungkutan ko para kay Riz.

"Mas mataas kasi ako ang respeto ng lalaki sa babaeng birhen. Tingnan mo na lang ang nangyari sa amin ng Daddy mo. Naghiwalay man kami... pero nando’n pa rin ang pagmamahal niya at respeto."

Tama naman siya. Hindi na nga lang ako nakapagkomento. Ayaw kong mapag-usapan namin si Riz. Alam kong hindi niya gugustuhing maging kami ni Riz dahil sa kanyang nakaraan. Gayunpaman, handa akong ipaglaban siya kung sakali. Kung tutuusin, isa ako sa may kasalanan sa nangyari sa kanya. Hindi ko siya ipinaglaban. Hinayaan ko lang na mahulog ako sa puso ni Dindee at hinayaan ko lang na makipaglaro siya kay Leandro. Huli na ang lahat nang mailigtas ko siya sa kapahamakan.. 

"Bakit mo naitanong, ‘nak?" Nagulat ako sa tanong ni Mommy. Interesado pala siya sa topic namin. 

"A... e, wala lang po. May nabasa po kasi akong novel." Dinivert ko ang attention niya sa pamamagitan ng paglipat-lipat ng channel sa telebisyon. Then, pumasok na ako sa aking kuwarto. Doon ay nag-FB ako. 

Nakita ko ang post ni Dindee. Sabi niya: "Sorry…"

Hindi ko alam kung sino ang pinatutungkulan niya. Binasa ko ang mga comments doon, pero wala akong nakitang clue. Hindi kasi siya sumagot sa mga friends niya. 

Napansin ko ring wala siyang masyadong na-post na pictures. Tinanggal niya nga ang iba na kasama ako. Inalis niya ang pagkakatag ko sa kanya. 

Nakakalungkot. Unti-unti na nga niya akong tinatanggal sa buhay niya.

"Musta ka na, Dee? Miss na kita!" Iyan ang message na iniwan ko sa kanya bago ko in-off ang desktop ko. 

Umaasa akong magre-reply siya.