BlurRed: Bilangguan at Blurred: Kumpletos Rekados (To be posted soon)

Bilangguan

Naghahanda kami ng mga gamit at pagkain para sa swimming namin sa Cavite nang tumawag si Riz. Umiiyak siya.

                "Red… si Leandro," aniya.

                "Ano si Leandro?" Nataranta rin ako. 

                "Nahuli na siya."

                "Mabuti 'yan! Bakit ka umiiyak? ‘Di ba, dapat maging masaya ka na?"

                "Kinakabahan pa rin ako, Red. Nasusuklam ako sa kanya. Gusto ko siyang..."

                "Riz, huminahon ka. Maging panatag na ang loob mo dahil tapos na ang pagtatago niya."

                "Puwede mo ba akong samahan? Gusto ko siyang makita."

                Pumayag akong samahan siya. Kinansela namin ang family outing para lang sa request niya. Sasama rin sina Mommy at Daddy upang personal na makaharap ang taong nagpabugbog sa akin. Gaya ni

Riz, galit na galit din sila kay Leandro.  

                Iyak nang iyak ang nanay ni Leandro nang madatnan namin sa police station. Imbes na magalit ang mga magulang ko, awa na lang ang umiral. Pinayuhan pa nila, ngunit kakasuhan pa rin siya at ang kanyang mga kasamahan ng frustrated murder. Rape naman ang ikinaso nina Riz sa kanya. Ngunit, dahil menor de edad siya, hindi muna siya makukulong. 

                Nakalapit naman si Riz kay Leandro, kaya sampal at tadyak ang inabot niya. Inawat lamang siya ng mga pulis.

                "Napakahayop mo! Sana dumating na ang araw ng pagkakakulong mo!" sigaw ni Riz. Nangangalit siya. "Kulang pa 'yan. Dapat sa 'yo mabulok sa bilangguan!"

                Matigas si Leandro. Parang hindi siya nasaktan. Hindi nagsalita, pero nakangisi pa. 

                Niyakap na si Riz ng kanyang ina, na lumuluha na rin. Panay naman ang paghingi ng apology ang mga magulang ni Leandro sa amin.

                "Napatawad ko na po siya… Pero, dapat din po siyang managot sa batas," sagot ko naman.

                "Salamat, iho!" turan ng ina. 

                Pagkatapos ng ilang minutong pirmahan, nagpasalamat at nagpaalam na si Daddy sa mga pulis na nakahuli at nag-asikaso ng kaso. Binigyan din nila kami ng garantiya, na hindi na uli makakapanggulo si Leandro. 

                Dahil may inihanda kaming pagkain, niyaya na lang ni Mommy sa bahay ang mag-anak ni Riz. Sumama naman sila. Parang selebrasyon daw iyon, anila. 

                Napasarap ang kuwentuhan ng mga magulang namin tungkol sa mga nangyari. Tapos, napag-usapan din nila kami. Bagay raw kami. Muntik na nga lang masambit ng nanay ni Riz ang salitang 'rape'. Na-gets ko kaagad. 

                "Wala naman pong problema. Si Riz pa rin naman po siya," sagot naman ni Mommy. 

                Kami ni Riz, pinagkasunduan naming mag-move on na lang sa bangungot na iyon. Mahirap nga lang, pero sisikapin namin. Sabi ni Riz, sobrang sakit na mawala ang pagkababae niya. Aminado naman akong mas masakit ang nangyari sa kanya kaysa sa pagkakagulpi sa akin. 

                "Gawin na lang nating aral at alaala ang lahat, kahit masakit," dagdag ko pa.

                "Red… may magmamahal pa kaya sa akin?" seryosong tanong ni Riz.

                Tinitigan ko muna siya. "Oo naman. May mga lalaking hindi tumitingin sa nakaraan. Gaya ko."

                "Sana. Sana, Red.."

                Alas-sais na ng hapon sila umuwi. 

Kumpletos Rekados

"Simula ngayon, wala ng maglilihim sa ating tatlo," sabi ni Daddy pagkatapos naming mag-aminan ng mga lihim namin sa isa't isa.

              Si Mommy ang nauna. Inamin niya na minsan siyang pinagnasaan ni Boss Rey. Kaya, nagkuwento na rin ako't sinuportahan ni Daddy. Naawa sa akin si Mommy. Pinahihinto na nga akong tumugtog. Pero, binida naman na ni Daddy ang ginawa niya, kaya nakakatiyak daw siyang ‘di na iyon uulitin ng boss ko.

"Sana nga, Red! Kapag ginawa niya ulit iyon sa 'yo, ‘di ko alam kung ano ang magagawa ko sa kanya."

Lumapit si Daddy kay Mommy at niyakap niya ito mula sa likod. "Sorry… Hindi dapat kami naglilihim ng anak mo." Kiniss niya pa sa buhok ang aking ina.

"Sorry rin kasi itinago ko sa 'yo o namin ni Red ang ginawang kabastusan sa akin ng manyak na 'yon."

Natawa ako. "Kasalanan ko po yata pareho."

''Siguro nga, Red!" biro ni Daddy.

              "Hindi naman. Kasalanan ng bading mong boss!" sagot naman ni Mommy. "Kulang na lang ang Daddy mo. Kumpletos rekados na."

Nagtawanan kami.

Kanina, nagtext si Riz. Sinabi niyang nalulungkot siya. Hindi ko alam kung paano ko siya matutulungan hanggang siya na mismo ang naghangad na magkita kami o kaya puntahan ko siya sa bahay nila.

Gusto ko. Ayaw naman ni Mommy. Ipinaramdam niya sa akin na huwag akong makipaglapit masyado kay Riz kung gusto kong makabalikan si Dindee. Mas gusto niya pa rin si Dindee para sa akin.

Hindi ko napagbigyan si Riz. Alam kong nalungkot siyang lalo nang hindi na siya nag-reply.