Buksan ang Pinto ng Kaalaman sa Pamamagitan ng NLP Library Card

 

Buksan ang Pinto ng Kaalaman sa Pamamagitan ng NLP Library Card

 

Gusto mo bang mapabilis at maging organisado ang panghihiram mo ng mga libro at paggamit ng mga resources sa Pambansang Aklatan ng Pilipinas? Simple lang! Dapat magkaroon ka ng library card, na magsisilbing susi sa pinto ng kaalaman.

                Ang Pambansang Aklatan ng Pilipinas (National Library of the Philippines o NLP) ay nag-aalok ng opsyonal na PVC library card para sa mga mambabasa at mananaliksik. Napabibilis nito ang paghahanap ng mga libro sapagkat mas kumpleto ang impormasyon dito. Karaniwan itong may barcode o QR code na puwedeng i-scan sa circulation system. Mayroon itong direct access sa OPAC (Online Public Access Catalog) kaya agad na makikita ang lokasyon ng libro sa aklatan at puwede ring mag-reserve online. Bukod pa sa mga ito, ang NLP library card ay nag-aalok ng mas maayos ang transaksyon sa mga tagapamahala ng aklatan.

                Sa pagpaparehistro at pagkuha ng NLP library card, pumunta lamang sa Registration Area, na nasa Cubicle 1 sa ground floor lobby. Tiyaking may dala kang valid ID at pambayad na P120.

                Sagutan ang pormularyo sa online, gamit ang tablet na ibibigay sa iyo. Tiyaking wasto ang mga impormasyong ilalagay sa online form. Ihanda ang valid ID para sa verification. Pagkatapos nito, magtungo ka na sa Cubicle 2 upang makuhaan ng larawan.

                Hindi pa makukuha ang PVC library card. Maaari pa itong magtagal ng ilang araw. Gayunpaman, makatitiyak kang masusulit mo ito kapag nakuha mo na dahil wala itong expiration. Ito ay may bisa hanggang ito ay masira o mawala.

                Kung sa araw na iyon ay nais mong magkaroon ng access sa aklatan, maaari ka namang kumuha ng NLP Client ID / Transaction Stub. Ito ay pansamantalang access lamang sa library services. Subalit mas mabilis mo itong makakuha. Wala pang 30 minuto ay makagagamit ka na ng aklatan.

Punan lamang nang wasto ang registration form. Magpresenta ng valid ID para sa verification. Paglipas ng 2 hanggang 3 minuto, may Transaction Stub ka na.  Libre ito, pero isang araw lang ang bisa.

May ilang multimedia/online resources na nagpapakita o tumutukoy sa proseso ng pagkuha ng library card sa National Library of the Philippines (NLP).

Una, sa website ng NLP, sa seksyon na Reader Services, may paglalarawan ng hakbang-hakbang na proseso sa paggamit ng Transaction Stub / Client ID at PVC library card.

Pangalawa, Sa NLP Information Guide (PDF) may bahagi na nagsasabing: “Proceed to the Circulation Counter and present the NLP Transaction Stub / Library Card to the Librarian on-duty…”

At mayroon ding mga videos sa Youtube, na nagbibigay ng panuto kung paano magproseso ng library card at transaction stub.

Kaya sa araw ng pagpunta mo, tiyak na hindi ka mahihirapan o maliligaw.

                Ang NLP ay bukas mula Lunes hanggang Biyernes ng ika-8 ng umaga hanggang ika-5 ng hapon. Kaya, ano pa ang hinihintay mo?! Pumunta sa Pambansang Aklatan ng Pilipinas, na matatagpuan sa T.M. Kalaw Street, Ermita, Manila.

                Ang library card ay access mo patungo sa iyong success dahil hindi lang ito isang pirasong plastik — ito ang iyong susi sa mundo ng kaalaman at tagumpay.