Kahit Musmos Pa
Unang linggo ng pasukan sa eskuwela
Pagiging pinuno ko’y agad na nakilala
Mga kaklase ko’y sa akin ay humanga
Nagningning agad ang aking mga tala.
Huminto sila nang ako’y pumagitna
Sa dalawang tigreng galit sa isa’t isa
Walang nais lumapit baka sila’y malapa
Sa illaw kong hawak, sila’y tumigil na.
“Puso niyo’y pag-isahin,” payo ko sa kanila.
“Maglalayag tayo sa ilog nang magkakasama.”
“Kailangan ng pakikiisa at pang-unawa.”
“Kaya ang biruan at sakitan ay iwasan na.”
Naging maamo na sila’t nagpasalamat pa
Kahit ang aming guro, sa akin ay humanga
Isang mabuting hari, sa akin ay nakita
Kaya ng araw na iyon, ang kanilang itinakda.
Sa silid-aralan, ako ang pangulo nila
Na katuwang ng guro sa pagdidisiplina,
Pagpapanatili ng kalinisan at pagkakaisa
At maging modelong lider kahit musmos pa.
No comments:
Post a Comment