Nasagutang Request Form? Request Granted!

 

Nasagutang Request Form? Request Granted!

 

Hindi man araw-araw, subalit may mga pagkakataong kailangan nating gumamit ng request form sapagkat mayroon tayong hinihinging pahintulot o dokumento. Nakatutulong ang wastong pagsagot nito upang maiwasan ang pagkakamali at pagkaantala ng transaksiyon.

Anomang uri ng request form ang sasagutan, mahalagang maging malinaw, kompleto, at maayos ang mga impormasyong ating isusulat o ilalagay upang mapabilis ang pagproseso nito. Narito ang mga simpleng gabay sa pagsagot sa request form:

Una, basahin at unawain muna ang buong request form. Tiyaking nauunawaan ang layunin nito. Alamin ang mga impormasyong hinihingi. Minsan, may mga nakalagay na instructions o guidelines sa form, kaya mas madali ang pagsagot.

Pangalawa, ihanda ang mga kinakailangang impormasyon. Kadalasan, mga personal na detalye ang hinahanap, gaya ng pangalan, address, contact number, at email, kaya dapat alam natin ang mga ito, at wasto ang mga ito. Maaari ding kailanganin ang ID, reference number, at iba pang supporting documents.

Pangatlo, sagutin nang malinaw at kompleto ang pormularyo. Kung printed form ang gagamitin, tiyaking malinaw ang sulat-kamay. Huwag mag-iiwan ng blankong sagot, kung hindi nakalagay ang salitang ‘Optional.’ At kung hindi angkop ang tanong, maaaring ilagay o isulat ang N/A (Not Applicable.)

Pang-apat, basahing muli bago ipasa ang request form. Tiyakin ang kawastuhan ng mga inilagay o isinulat na impormasyon. Tama ba ang mga baybay (spelling), numero, at petsa? Huwag din kalilimutan ang pirma— kung kinakailangan.

At panghuli, ipasa ang request form batay sa tamang proseso. Kung online, i-upload ang file nito ayon sa instruction. Kung via email, siguraduhing wasto ang email address ng padadalhan, at isaalang-alang ang wastong pagsusulat ng email. At kung personal namang ipapasa sa opisina, tiyaking naiabot sa tamang taong tatanggap nito. Maaari ding magtabi ng pansiriling kopya.

            Kapag naisagawa nang wasto at maayos ang mga hakbang na ito, tiyak na magiging request granted ang kahilingan nating dokumento o ano pa man.