Sa Dulo ng Bahaghari
“Dulo ng bahaghari ba’y may kayamanan?”
Libo-libo na ang aking napagtanungan
Lahat sila-- ako’y kanilang pinagtawanan
Kahit tumanda ako, `di raw masusumpungan.
Libo-libo kong tanong, may milyong kasagutan
Ako na mismo ang tutuklas sa katotohanan
Kaya, isang araw, ako’y nag-alsa-balutan
Nang bahaghari ay natanaw sa kalayuan.
Umulan-umaraw, ako’y sumige lang
Walang pangarap na suntok sa buwan
Bawat hakbang patungo sa paroroonan
Ay walang katumbas, ni gintong makinang.
Laylay aking dila sa labis na pinuntahan
Paglakad at pag-abot ay walang katapusan
Nang malapit na, bahaghari’y nasaan?
Hindi na matanaw kahit sa kalawakan.
Pangarap na kayamanan ay kay layo naman
Sana, mga tawanan nila’y aking pinakinggan
Paniniwala ko’y biktima ng kasinungalingan
Kalaro ko nito’y tiyak ako’y pagtatawanan.
No comments:
Post a Comment