Gabay sa Ligtas na Pag-akyat sa Mount Pico de Loro

 

Gabay sa Ligtas na Pag-akyat sa Mount Pico de Loro

 

Nais mo bang maranasan ang ganda ng kalikasan sa tuktok ng Mount Pico de Loro? Bago simulan ang pag-akyat, alamin muna ang mahahalagang paalala at gabay upang maging maayos at ligtas ang iyong paglalakbay.

Ang Mount Pico de Loro, na kilala rin bilang Mount Palay‑Palay, ay matatagpuan sa hangganan ng lalawigan ng Cavite at Batangas. Ito ay bahagi ng Mounts Palay‑Palay–Mataas‑na‑Gulod Protected Landscape, isang protektadong kapaligiran para sa kalikasan.

Ang Mount Pico de Loro ay may tinatayang taas na 664 metro sa ibabaw ng dagat. Sikat na sikat ito dahil sa taglay nitong “monolith” o vertical rock face sa tuktok (summit). Ito ang nagbibigay makapigil-hiningang tanawin sa summit nito. Dito makikita ang malawak na malawak na tanawin ng Cavite, dagat, at karatig-lalawigan. Sulit ang buwis-buhay na pag-akyat dahil ang ganda-ganda ng view roon.

Ang lapit-lapit lang ng Mount Pico de Loro sa Kamaynilaan, kaya patok na patok ito sa mga day-hikers, na may limitadong oras. Gayunpaman, mahalaga pa rin ang maagang online booking dahil limitado lang ang bilang ng makakapasok at makakaakyat bawat araw.

Matatandaang isinara ito Oktubre 1, 2016 upang isagawa ang rehabilitasyon dahil sa labis na pagkasira ng lupa, basura, at hindi kontroladong pag‐akyat. Ang muling pagbubukas nito noong Enero 12, 2023 ay may kaakibat na mga bagong patakaran, gaya ng paniningil ng abot-kayang entrance fee.

Para sa tiyak at ligtas na pag-akyat sa tuktok ng Mount Pico de Loro, sundin lamang ang mga sumusunod na paalala at gabay.

Magpa-online booking bago pumunta upang maiwasan ang di-inaasahang problema sa pagpasok. Alamin ang weather forecast bago umalis. Madulas ang trail kapag umuulan.

Maagang magsimula sa pag-hike upang maiwasan ang init at upang magkaroon ng sapat na oras sa pagbaba.

Huwag kalimutang magbaon ng sapat na inuming tubig, pagkain, at angkop na hiking gear dahil may mga lantad na lantad na bahagi ng trail.

Igalang ang kalikasan at sundin ang mga patakaran ng protektadong lugar. Huwag magtapon o mag-iwan ng basura doon. Iwasan ding makasira ng mga halaman o bato.

Ang pag-akyat sa bundok ay hindi lamang isang adventure kundi isang pagkakataon upang mas mapahalagahan ang kalikasan. Sa pagsunod sa mga patakaran at paggalang sa kapaligiran, masisiguro mong ligtas, masaya, at makabuluhan ang iyong paglalakbay sa tuktok ng Mount Pico de Loro.