BlurRed: Buffet

"Bro, samahan mo nga akong bumili ng drumsticks." Bigatin na si Jeoffrey. Tumatawag na siya. Hindi na siya marunong magtext.

"Hindi pa ako nakapaghanda ng tutugtugin ko mamaya."

"Mabilis lang naman."

Napilit niya ako. Sumama ako kasi libre daw niya ako ng pagkain.

Binilisan namin ang pagbili para makauwi ako agad. Kaya lang, tumawag si Boss Rey kay Jeoffrey. Noong una ay hindi ko alam. Nang tumigil ang kotse niya sa harap namin, saka ko lang na-realize na siya pala ang kausap ni Jeoffrey.

Grabe! Nag-eenjoy na siya sa relasyon nila. Sabagay, nagiging mapera siya dahil dito.

Nasa kotse na kami nang nagsalita si Boss Rey. "Mabuti, nakasama ka kay Jeoffrey, Red."

Hindi na ako nagpaliwanag. Tumango lang ako dahil tiningnan niya ako sa salamin.

"Kakain tayo sa buffet. Treat ko." announce ng boss namin, boss ko pala.

Si Jeoffrey lang ang nagpakita ng katuwaan. Natuwa din ako dahil first time ko sa buffet restaurant.

Andami kong nakakain. Siyempre, andami ring kuwentuhan. Nakakawala daw kasi ng busog kapag nagkukuwentuhan.

Sa aming pagkukuwentuhan, napansin kong hindi naman sweet ang dalawa. Parang hindi naman sila. Siguro, dahil nasa public kami. Napuna ko lang kasi parang ako lagi ang kinakausap ni Boss. Panay ang tanong tungkol sa akin. Nalaman niya na nga ang tungkol sa.pag-aaral ko pati ang mga babaeng malapit sa akin. Para ngang wala siyang ginawang masama sa akin noon kung makapagtanong. Sabagay, wala namang masama. Ang ayoko lang malaman ay kung may pagnanasa pa rin siya sa akin.