BlurRed: Pasalubong

"Iuwi mo na lang ang mga 'yan." Ni hindi ko nga hinawakan ang mga dalang pagkain ni Jeoffrey, nang malaman ko na galing ang mga iyon kay Boss Rey.

"Arte mo naman! Ikaw na nga ang inalala, e." Binuksan niya ang box ng pizza at kumuha ng isang slice. "Huwag mo na lang kasing isiping galing kay Boss." 

"Basta! Ayoko niyan!"

Hindi na niya ako pinilit. Pero ako, pinilit ko siyang magsabi ng totoo kung bakit ginagawa ito ng aming boss, gayong siya naman ang jowa.

Nagtapat siya.

Kaya pala nasabi niya noong isang araw na malalaman ko rin kung bakit ginagawa niya ang mga bagay na iyon.

Walang hiya! Ako pala talaga ang trip hindi si Jeoffrey. Ginamit at ginagamit lang siya.

"Ang suwerte mo nga, e. Nasa iyo na ang lahat, sabi ni Daniel Padilla. Kung ako lang ikaw..."

Hindi na niya naituloy.

"Tadyakan kita, e. Hindi ako ikaw. Sana umiwas ka na. Wala kang mapapala sa ganyan. Ako kung pwede lang.. kung wala lang akong kontrata sa kanya, hindi na ako tutugtog sa bar niya. Dapat sa kanya magtayo ng gay bar."

Natawa si Jeoffrey, pero ako nabubuwisit. Ayoko kasing maalala ang pambababoy niya sa akin.

Alas-singko na nagpaalam si Jeoffrey. Hindi naman niya dinala ang mga pagkain. Sabi niya kina Daddy, pasalubong daw niya.

Ang yabang ng mokong!

Pagkaalis niya, nakaramdam ako ng takot. Kakaibang takot. Hindi ko maipaliwanag.

Nagtanong naman si Daddy. Bakla daw ba si Jeoffrey?

"Hindi po! Bakit po?" 

"Parang bakla magsalita, e. Saka, iba ang mga hawak sa'yo.." 

Hindi ba ako nagsalita. Hindi ko naman kasi iyon napansin.

Hindi naman siya bakla. Namamakla siya. Kung alam lang ni Daddy.