Red Diary: All of Me

Atat na atat na akong maging girl friend si Dindee. Hindi ko na kayang maghintay pa ng isa pang buwan. Mahal ko naman siya. Hindi niya lang kayang paniwalaan ang mga ipinakikita at ipinaparamdam ko.

Ginitarahan ko siya habang naglalaba siya ng kanyang mga damit. Nakalimang kanta ako bago siya nagsalita.

"Alam mo, Red, kilig na kilig ako tuwing kinakantahan mo ako at ginigitarahan. Kaya lang.."

"Kaya lang, ano?"

"Kaya lang..hindi pa ngayon ang tamang oras."

"Kelan?"

"Basta."

Hindi na ako nagtanong pa. Kinanta ko naman ang ikaanim na kanta--- ang "All Of Me". Habang kinakanta ko iyon, lumalayo na ako sa kanya. Sa sala ako pumuwesto. Alam ko, naramdaman niya ang kalungkutan ko nang umalis ako.

Tatlo pang malulungkot na kanta ang tinugtog ko bago ako huminto. Tapos, ang remote control toy car naman ang naisipan kong ipang-aliw sa sarili ko. 

Naalala ko pa ang nakuha kong puntos kay Dindee nang padalhan ko siya ng note gamit ang laruan ko. Biglang pumasok sa kukote ko na gawin ulit iyon this time. Kaya, agad akong nagsulat ng note sa kapirasong papel.