Red Diary 85: Official Candidates

            Nagulat ako kanina sa PE period namin. Pinatayo ako ni Sir Briones sa harapan. Tinawag din si Riz at si Nico. Mga guwapo raw kami at maganda si Riz. Kami na raw ang tatlo sa official candidates sa Mr. & Ms. Campus Personality 2014.

             "Hala, Sir!" Nag-react ako sa sobrang gulat. Nag-disagree rin ang dalawa. Ang mga kaklase naman namin ay nagpalakpakan. Parang pumayag na kami. Hindi ko nga nabasa sa bulletin board ang tungkol dito, e. 

            "I'll give you high grades, kung sasali kayo," offer ni Sir. Medyo, malambot siya kaya, malambot din ang pagkasabi.

            "Sir, paano po kung matalo ako? Mataas pa rin po ba ang grade ko?" Si Nico, interesado yata. Kaya lang pinagtawanan siya, kasi alam naman namin na may kahinaan siya.

            "Opo. Win or lose. Just join."

            “Yes, Sir! Payag na po ako!" confirmation ni Nico. Ang lakas ng loob niya. Oo, may katawan at may itsura siya, pero kailangan ng brain, lalo na sa Q&A. Pero, I wonder, bakit siya kinukuha ni Sir?

            "Ok. I'll count you in. How about you, two?" tanong ni Sir sa aming dalawa ni Riz. "You got the looks and brains. Ito ngang si Nico, pumayag na, e..." Hmm, may gustong ipakahulugan si Sir. Hindi na niya tinuloy.

            Hindi ako nag-confirm. Pero, hindi rin ako umayaw. Humingi ako ng isang araw para mag-isip. Kailangan ko rin kasing i-consider ang gastos at ang time. Baka makaapekto ito sa studies ko.

            Si Riz, hindi rin kaagad umuo. Itatanong pa raw niya sa parents niya. Tiningnan pa nga niya ako, bago kami pinaupo na para bang humihingi siya ng approval mula sa akin. 

            Kung competition  ang turing ko sa co-curricular activities na sasalihan namin, hindi ako papayag na sumali siya. Pero, dahil gusto kong mapalapit sa kanya. Gusto kong pareho kaming makasali.