Red Diary 19: Nice

Nagseselos ako. Nang nag-online ako at nag-open ng Facebook, nakita ko ang in-upload niyang selfie picture na kasama ang isang lalaki. Dikit na dikit ang mga pisngi nila. May hashtag pa. Sabi niya: #feelinghappy. Nagpapaselos ba siya? Effective... Nagseselos ako. Ngayon ko lang kasi nakita ang mokong na iyon. Hindi namin iyon classmate o schoolmate. Malamang, kapitbahay niya ‘yun. Gusto kong makilala ang pinili niya, kaso hindi niya tinag, kaya ‘di nag-appear ang pangalan. Sa dami naman ng friends ni Riz, hindi ko naman maisa-isa pang buksan. Ang iba kasi poser naman at anime ang profile pic. Di ko maiwasang magselos. May itsura naman ‘yung lalaki. Mas gwapo nga lang ako. Pero ang bottomline, siya pa rin ang choice ni Riz. Hindi ako. Hindi ko kasi siya sineryoso. Gusto kong mag-comment sa picture nila, pero pinigilan ko ang sarili ko. Wala akong dahilan para magselos. Siguro kung magkokomento ako, ‘nice one’ ang dapat kong sabihin. Nice shot. Pero, hindi nice na maging sila. Hindi ako papayag.